رتو ڪوٽ جي قلعي جي ابتدا اڃا تائين ھڪ ڳجھ بڻيل آھي. جيڪو گهارو کاري جي منهن واري  پاسي  ۽ قديم بندرگاهه شهر  ڀنڀور کان فقط  ۲۹  ڪلوميٽرن جي مفاصلي تي موجود آھي.  ڪجهه عالمن اهو تجويز ڪيو آهي ته قلعو هن وڏي واپاري مرڪز جي حفاظت لاءِ ٺاهيو ويو هو. آثار قديمه جي ثبوتن مان معلوم ٿئي ٿو ته قلعو ساساني دور جي پڇاڙيءَ کان يا اوائلي اسلامي دورکان وٺي ۱۳ صدي عيسويءَ  تائين آباد  رھيو . هن عرصي مان ظاهر ٿئي ٿو ته اهو قلعو شايد ۷۱۱ ع ۾ سنڌ جي اسلامي فتح کان بہ اڳ جو هيو.

قلعي جي اڏاوتي خصوصيتن ۾ عرب اثرن جي بجاءِ فارسيءَ  اثرن ڏانهن اشارو ڪن  ٿيون . دفاعي مينارن جو وڏو تعداد ۽ دروازي جي جوڙجڪ ساساني فوجي فن تعمير سان گھڻي مشابهت رکي ٿي.  تاريخي رڪارڊ  موجب پنجين صدي عيسوي جي شروعات ۾ سنڌ جي سامونڊي ڪناري تي ساساني اثر موجود ھئا. چيو وڃي  ٿو تہ سنڌي  حڪمران شنڪلات پنھنجي ڌيءَ جي شادي لاءِ  ديبل شهر  ۽ ان جي ڀرپاسي وارا علائقا ساساني بادشاهه بهرام پنجم (۴۳۶-۴۲۱عيسوي) (گھوش، ۲۰۰۳) کي  ڏاج طور ڏنا.   ڇا اھو ممڪن آھي تہ  قلعي جي ابتدا ساساني دور ۾ ٿي ھجي؟