ھن منصوبي هن منفرد ورثي جي تجربي کي ترتيب ڏيڻ لاءِ مختلف اوزارن ۽ جديد طريقن جو استعمال ڪيو آھي، وسيع تاريخي ۽ آرڪائيو تحقيق هن عمل جو بنيادي طور ڪم ڪيو، جنهن ذريعي ماڳن جي اصل مقصد، رهواسين، ۽ سندن زوال بابت اهم تفصيلات سامهون آيون. جتي تاريخي حوالا محدود هئا، اتي ٽيم آثار قديمه جي رپورٽن تي ڀروسو ڪيو ۽ انهن ماهرن ۽ تاريخدانن سان سڌو سنئون رابطي ۾ آئي، جن انهن ماڳن تي ڪم ڪيو هو. انهن ماهرن پنهنجا ذاتي تجربا ۽ اهي چئلينج شيئر ڪيا، جيڪي انهن کي آثار قديمه جي ثبوتن جي تشريح ڪرڻ دوران پيش آيا.

ھن منصوبي مقامي ماهيگيرن جي انمول ڄاڻ تي پڻ ڌيان ڏنو، جن  ۾ ڪميونٽي جون ڪهاڻيون ۽ لوڪ داستانن جي ڄاڻ پڻ ڏني ته ڪيئن اھي ماڳ سالن کان تبديل ٿيا آهن ۽ ڪيئن اهي مقامي برادرين جي زندگين سان ڳنڍيل آھن. فيلڊ ورڪ هن منصوبي جو هڪ اهم حصو هو، جنهن دوران ٽيم هفتن تائين ڇوڙ واري علائقي جي ڏکين رستن کي طئي ڪيو، مٽيءَ جي کڏن، تمر جي ٻيلن، ۽ ساحلي ٻيٽن مان گذرندي. مقامي ماهيگيرن فراخدليءَ سان مدد فراهم ڪئي، ڏورانهين ماڳن تائين پهچڻ لاءِ ٻيڙين ۽ موٽرسائيڪلن ذريعي ٽرانسپورٽ مهيا ڪئي. انهن دورن دوران گڏ ڪيل ڊيٽا کي نهايت سڌريل طريقي سان پروسيس ڪيو ويو ته جيئن انهن جڳهن جا تفصيلي 3D ماڊل تيار ڪري سگهجن.

آخرڪار، مختلف ذريعن مان حاصل ٿيل معلومات، تاريخي مواد، مقامي ڪميونٽي ۽ ماهرن جا انٽرويو، ۽ ٽي رخي ڊيٽا کي گڏ ڪري “دي لاسٽ سٽيز آف انڊس ڊيلٽا” جو تجربو تيار ڪيو ويو. اسان توهان کي دعوت ڏيون ٿا ته هن غيرمعمولي ڊجيٽل سفر کي ڳوليو ۽ سنڌو درياءَ جي ڇوڙ سان جُڙيل ڳجهن کي وائکو ڪريو.